Borok Dopha Khristan Wngmani Laibuma

1938 –o Manindra Debbarma(Moino) bini kami khe Bisharamganj amchoini Bastoli-o. A jora- o Manindra Missionaryrokni thani-o Jisuni kothoma kaham khwnaui bo Jisuno mwthangnaisa hwnwi yachak kha. Bo khoroksa kaijakhai phano bo Jisuno yachakmani bagwi bini kamini bororok bono kami-o tongnani rw lwya aboni bagwi bini bihik khe bono kagwi kwlang kha. A jora- o omo hai khe sakni borok bai  norjak phano kothoma kaham ṕirna phano yakar ya. Salsa bo Lalsingmurani Amtali kamio kothoma kaham ṕ́irna tháng kha, a jorao Gopal Thakurni nogo bo Jisuni kók sanani thang kha, hai phano bono nogo hap rwliya. Nok bara- o mai chárwi mayang? nukgo se thowima aisi-o. Obo hai aro uro tongmani yagulo kisa sal Udaipurni Gorji kami-o Garo khristanrok tongo aro sal kisa borok bai tongmani yagulo Agartala Mission Compoundo phai tong phai kha.

A jorao Ramnagar parani Rajendra Debbarma bini bukhrani nok Daleswhar-o tong phai-o.  Manindra bai Rajendra borok kiching kuma, aboni bagwi bórok malai lai –o, aphrú-no Manindra bono Jisuno rom sidi hwnwi sa-o. Aboni yagulo 1941 Manindra Debbarma thwi ja kha. Omo hai kheno swkang khristan wngnai sa ṕai thang kha. Bo thwimani yagul-o 1959-o Bishramganj Padhanagarni Kamal Debbarma bai bini bihik Garo- Gongrai kami-o thángwi Pastor Digendrani yago baptisma wngo. Baptisma wngwi nogo kiphilwi tháng khe nok sókjak nugwi kha, bini buwai Sashikumar Debbarma khristan wngo hwnwi chajakya wngwi bini nok sógo. O Kamal Debbarma Jisuno romnani swkang a jora ni Communist movementni Shantisenani bokhrok tongmani. A jorao bini tongmani cam hwn khe Kalasathi Kami–o. Pastor Shekarni dormani halog. Jisuno rom khe-no bo kalasathi-o thángwi Jisuni kók no piŕwi kha. Abo hai khe -no Kamal Debbarma ulo khe Tripura Theological School-o bisiknwi yagulo Kaitorni kók pírna bagwi Tripura hani kókborok sanairok ni bagwi Evangelist chongjak kha. Bini bising t́wino 1960 o Burkur kami-o  Jisuni kók pirma t́wi Borkur kamio Motha achai kha. Aphruni Khristanrok khe Ranjan Debbarma, tei bini bwsla song Mongal Debbarma , Sikrai Debbarma, Subhi Debbarma songno Borkur Mothani bororok. Aphru baptisma rwnai pastor hwn khe Rev. Amritalal Roy o para ? no puila khristan kailaimung wngo. Ranjan Debbarmani sajwk bai Lakhiram kamini Kala Debbarmano kalai-o. Tei Thwima bo o kami-o no thwi-o. Tei a kwthwino phobna phru khe belai khe kwbangma kebengmung sok phai kha. Kamal Debbarma Kaitorni kók piŕwi tong phano kókborok sanairok Jisuno yachaknai kwrwi hwnwino mano.

Aboni bisingo 1963-o ang Ambassa o Government employee khorokthamrok baptisma na lai kha. Abórok wng kha Mr. Biralal Debbarma (Durgachowdhary Kami) Mr. Sasanka Debbarma(Bowliya kami, Ambassa) Mr. Harinath Debbarma(Kailaswar, Joiganti Kami). A bórorok bo Khristan wngmani bagwi belai khe sathok- pitok man bai kha. Bórokni yagul-o khe sal kolok ma yagul-o 1970 yaphang bai bochug-o Ramesh Debbarma(Lakhiram Kami Bishramganj) Jong Bahadur Debbarma (Ramnagar) Jisuno rom kha. Bórokno TBCU ni Womens societyrok Twipura hao Kaitorni kók pirnani bagwi chong kha. Aphruni simi Kokborok sanairok bo swkangni salai Jisuni kók khwnanani bagwi nai kha. Tei kami kamio khroksa khroksa khe Jisuno romnani cheng kha. Omo hai kheno Aguli amchoi, Khowai amchoi, Udaipur amchoi Sabrum amchoio, kaisa kwiso Motha chengsanani cheng kha. Aboni bisingo kókborok bai Baibelni  kokthai porinani tei sakni kók baino tei  Kaitorno lobnani cheng jak kha. Kokborok sanai khristan rok sak ni kanmung chumung nw kwtal khe kanlaina chumlai na cheng kha. Omo hai kheno borok dophani bisingo sláijakmung sókphai kha. Tei 1987 o Twipra ha-o revival ni nokbar sibmani bai kókborok sanairok ni bisingo tabuk Motha simi-o bo bathagwi tong liya erte erte (10) Association wng kha.

Chwngno norok ni swngmung tei sahormung rok rohor di.